Hunt for the Wilderpeople (te reo Māori)

He aha te kaupapa?

I muri i te wehenga atu o te tamaiti tutū, a Ricky Baker, rāua ko tana matua keke whāngai i tō rāua pāmu, i tō rāua ngaronga i te ngahere o Aotearoa, ka tīmata te rapunga tangata ā-motu hei whakahoki i a Ricky ki te tiakanga whāngai.

Ngā meka

• Ko te ringatohu ko Taika Waititi (Thor: Ragnarok, Jojo Rabbit, Boy)
• Te reo Ingarihi
• Wā whakaatu: 101 miniti
• Koinei te kiriata i tino kaha katoa te hokona o ngā tīkiti, o ngā kiriata katoa kua puta i Aotearoa mai rā anō.
• I whakawhiwhia ki ngā tohu e ono ki te New Zealand Film and TV Awards i te tau 2017, mō te Kiriwhakaari Tino Pai, mō te Kaitohu, mō te Kiriata, mō te Kiriwhakaari Tautoko, mō te Kiriwhakaari ā-Wahine Tautoko, mō ngā Rākeitanga Ataata hoki.

He aha i whiwhi ai i tēnei whakatauranga?

I whakatau whakawhitihia tēnei kiriata e te Film and Video Labelling Body. Ka taea e koe te rapu mōhiohio anō mō te whakatauranga ā-whiti ki konei.

Te whakarekereke

He iti noa te whakarekereke i te kiriata heoi anō arā te whakarekereke pū, ngā whara ā-toto, te whakarekereke ki ngā kararehe anō hoki. I roto i ngā kāpeka tino kaha ko ēnei:

• Ka whakamamaetia tētahi kiripuaki me tāna kurī ka whakaekengia ai e te poa puihi. Ka whara taumahatia te kurī, ā, ka kitea ētahi toto i tōna huruhuru. He taumaha tā te kiripuaki whakatau ki te whakamate rawa i te kurī. Kāore i te kitea i te mata, engari ka rongo mātou i te puhinga o te pū, nā konei ka pupū ake ngā kare ā-roto i tēnei kāpeka.
• Ki ngā kāpeka e rua, ka whakamatea rawatia tētahi poa puihi—i tētahi ki te naihi, ā, i tētahi atu ki te pū. He taumaha ēnei kāpeka, ka whakaaturia te toto, ā, ka pāmamae pea ngā kaimātakitaki rangatahi, tamariki rānei, ngā tāngata ka manawarau i te tūkino kararehe rānei.
• Ka pūhia tētahi tāne i te remu, engari he mea whakakata te kāpeka, ehara i te tino ngangahu.
• Ka takoki te punga o tētahi tāne i te aka o te rākau, ā, ka rangona te pakē, heoi kāore te whara e whakaaturia.

Ngā kāpeka whakaaroha

I muri i te hemonga rawatanga o tētahi kiripuaki, ka takoto tētahi atu kiripuaki i runga i te tinana, e kitea ana te mamae. Ahakoa kāore i te whakaaturia te matenga ake, ka pāmamae pea ētahi kaimātakitaki i tēnei kāpeka, inarā ko te hunga kua pāngia ki te ngaronga ōrite.

Te reo mōrihariha

Ka whakapuakina ngā kupu pērā i “d*ck,” “wanker,” “bastard,” me “asshole”. Ka tino whakamahia ngā kupu i te horopaki whakakata, ā, i ētahi wā i roto i te waiata, i te rotarota, i te kōrero whakakata, i te kōrero paki rānei.

I te taha o te reo mōrihariha, kei te kiriata te whakahangareka o Aotearoa, he mea whakatumatuma, he mea tōtika hoki. I roto nei ko ngā wā ka rūkahu tētahi kiripuaki mō te whāwhāngia hei ārai i te mauhanga e ngā pirihimana, ā, ko tētahi atu wā ka kōrerotia e tētahi kiripuaki te kōrero, ko te āhua nei, i pāwheratia ia.

Ahakoa he kaupapa taumaha ēnei, ka whakangāwaritia e te whakahangareka tahi ki te wairua o te harakore ā-tamaiti, te pānga o te reo, o ngā horopaki hoki. Ka whakaaturia te reo mōrihariha me ngā kōrero paki ki te wairua e hiwa ana, engari ehara pea i te mea whakakata ki ētahi kaimātakitaki.

I te wā ka mau ki te kūrae o hirikapo ngā kaupapa:

He tepenga ō tātou katoa, ā, he mea māori noa mēnā ka taumahatia tō hinengaro i ētahi mea kua kite koe. Ki te iri tonu ētahi kaupapa ki tō hirikapo, me whai whakaaro anō te kōrerorero ki ō hoa, tō whānau rānei, ki te wetewete i ngā kaupapa i mātakihia e koe. Engari mēnā kei te pā kino tonu ki a koe, tēnā toro atu ki ētahi o ngā waea āwhina i raro nei.

• 1737
• Safe to talk
• Lifeline
• Youthline

Ētahi atu mōhiohio

• He aha e nui ai ngā whakatauranga me ngā whakatūpato ki a mātou ko tōku whānau?
• Te whakawhanaketanga o te roro – te āhua o te whakawhanaketanga, ngā take e whaitake ana